PITUTUR LUHUR
@ziatuwel
Ya Rosulalloh Salamun Alaik
Ya Rofi'as Syani Waddaroji
.
Iki pitutur luhur leluhur
Angen-angena he para dulur
Supaya urip ing dunya mujur
Dadi pepadhang ing jero kubur
.
Elinga Gusti kang ora sare
Tansah angreksa ing kawulane
Padha elinga sarta waspada
Aja sembrana lan aja lena
.
Sapa sing nandur winihing budhi
Bakale ngundhuh wohing pakerti
Rukun agawe urip santosa
Pecah agawe bubrah sedaya
.
Wong gelem obah ya mesthi mamah
Aja lelahan ayo gumregah
Yen ana dina ya ana upa
Sregep dedunga sregep makarya
.
Sepi ing pamrih rame ing gawe
Aja mung gunem kembange lambe
Seja kang apik kudu ditandhang
Aja mung gludhug kang tanpa udan
.
Srawung ing desa ya mawa cara
Mbangun negara ya mawa tata
Urip bebrayan sawang sinawang
Umpama cakra ling manggilingan
.
Sabaya pati sabaya mukti
Bungah lan susah bareng nandhangi
Sadumuk bathuk sanyari bumi
Gawe sulaya ditohi pati
.
Dadiya sira bisa rumangsa
Aja dadiya rumangsa bisa
Mikula dhuwur mendhem sing jero
Becik ketitik ala ketara
.
Sugiha sira tanpa bebandha
Tanpa aji ya tetep digdaya
Nglurug ing mungsuh tanpa bebala
Tanpa ngasorke menang lan jaya
.
Aja gumunan aja kagetan
Aja getunan aja aleman
Aja kesusu ing gegayuhan
Nrima ing pandum Gusti Pangeran
VERSI PEGON
فيتوتور لوهور
ايكي فيتوتور لوهور ليلوهور
اڠين اڠينا هي فرا دولور
سوفايا اوريف اڠ دنيا موجور
دادي فيفاداڠ اڠ جيرو قبور
ايليڠا ڬوستي كڠ اورا ساري
تانساه اڠريكسا اڠ كاوولاني
فدا ايليڠا سرتا وسفادا
اجا سمبرانا لن اجا لينا
سفا سيڠ ناندور وينيهيڠ بودي
بكالي ڠوندوه ووهيڠ فاكرتي
ركن اڬاوي اوريف سانتوسا
فيجججاه اڬاوي بوبراه سيدايا
ووڠ ڬيليم اوباه يا ميستي ماماه
اجا ليلاهان ايو ڬومريڬاه
يين انا دينا يا انا اوفا
سريڬيف ديدوڠا سريڬيف ماكريا
سيفي اڠ فامريه رامي اڠ ڬاوي
اجا موڠ ڬونيم كيمباڠي لامبي
سيجا كڠ افيك كودو ديتانداڠ
اجا موڠ ڬلودوڬ كڠ تنفا اودان
سراووڠ اڠ ديسا يا ماوا چارا
مباڠون نيڬارا يا ماوا تاتا
اوريف بيبرايان ساواڠ سيناواڠ
اومفاما چاكرا ليڠ ماڠڬيليڠان
سابايا فاتي سابايا مكتي
بوڠاه لن سوساه باريڠ نانداڠي
سادوموك باتوك ساييياري فاتي
ڬاوي سولايا ديتوهي فاتي
دادييا سيرا بيسا روماڠسا
اجا داديا روماڠسا بيسا
ميكولا دووور منديما جيرو
بيچيك كيتيتيك الا كيتارا
سوڬيها سيرا تنفا بيباندا
تنفا اجي يا تيتيف ديڬدايا
ڠلوروڬ اڠ موڠسوه تنفا بيبالا
تنفا ڠاسوركي ميناڠ لن جايا
اجا ڬومونان اجا كاڬيتان
اجا ڬيتونان اجا اليمان
اجا كيسوسو اڠ ڬيڬايوهان
نريما اڠ فاندوم ڬوستي فاڠيران
